எம்சிஏ மைதானத்தில் நேற்று இரவு நடந்த இப்போட்டியில், டாஸ் வென்ற கேகேஆர் கேப்டன் ஷ்ரேயாஸ் முதலில் பந்துவீச முடிவு செய்தார். மும்பை இந்தியன்ஸ் தொடக்க வீரர்களாக கேப்டன் ரோகித் ஷர்மா, இஷான் கிஷன் களமிறங்கினர். 12 பந்துகளை எதிர்கொண்ட ரோகித்  3 ரன் மட்டுமே எடுத்து உமேஷ் வேகத்தில் விக்கெட் கீப்பர் பில்லிங்ஸ் வசம் பிடிபட்டார்.

இஷான் – டெவால்ட் பிரெவிஸ் இணைந்து 2வது விக்கெட்டுக்கு 39 ரன் சேர்த்தனர். பிரெவிஸ் 29 ரன் (19 பந்து, 2 பவுண்டரி, 2 சிக்சர்) விளாசி வருண் சுழலில் ஸ்டம்பிங் செய்யப்பட்டு வெளியேறினார். மும்பை அணி 11 ஓவரில் 55 ரன்னுக்கு 3 விக்கெட் இழந்து திணறிய நிலையில், சூரியகுமார் யாதவ் – திலக் வர்மா ஜோடி 4வது விக்கெட்டுக்கு உறுதியுடன் போராடியது.

கடைசி கட்டத்தில் இருவரும் அதிரடியில் இறங்க மும்பை ஸ்கோர் சற்று வேகம் எடுத்தது. சூரியகுமார் 34 பந்தில் அரை சதம் அடித்தார். அவர் 52 ரன் (36 பந்து, 5 பவுண்டரி, 2 சிக்சர்) விளாசி கம்மின்ஸ் வீசிய கடைசி ஓவரின் முதல் பந்தில் பில்லிங்ஸ் வசம் கேட்ச் கொடுத்து ஆட்டமிழந்தார். அடுத்து வந்த போலார்டு 3 சிக்சர்களைப் பறக்கவிட்டு அசத்த,  மும்பை இந்தியன்ஸ் அணி 20 ஓவர் முடிவில் 4 விக்கெட் இழப்புக்கு 161 ரன் குவித்தது.

திலக் வர்மா 38 ரன் (27 பந்து, 3 பவுண்டரி, 2 சிக்சர்), போலார்டு 22 ரன்னுடன் (5 பந்து, 3 சிக்சர்) ஆட்டமிழக்காமல் இருந்தனர். கொல்கத்தா பந்துவீச்சில் கம்மின்ஸ் 2, உமேஷ், வருண் தலா 1 விக்கெட் வீழ்த்தினர். இதைத் தொடர்ந்து, 20 ஓவரில் 162 ரன் எடுத்தால் வெற்றி என்ற இலக்குடன் கேகேஆர் களமிறங்கியது.